నిరుద్యోగ బీమా: ప్రజల జీవన ప్రమాణాలు పెరుగుతుండగా.. ఆర్థిక, ఆరోగ్య సమస్యలు కూడా పెరుగుతున్నాయి. వీటి నుంచి కొంత ఉపశమనం పొందడానికి బీమా తీసుకోవడం ఉత్తమమైన మార్గాలలో ఒకటి.
అయితే ఆరోగ్య బీమా, వాహన బీమా తదితరాలు సరే.. నిరుద్యోగ బీమా గురించి ఎప్పుడైనా విన్నారా?
క్రమశిక్షణా చర్య లేదా రాజీనామా కాకుండా ఇతర కారణాల వల్ల ఉద్యోగం కోల్పోయే వ్యక్తికి ఆర్థిక భద్రత కల్పించడానికి నిరుద్యోగ బీమా రూపొందించబడింది. యునైటెడ్ అరబ్ ఎమిరేట్స్ (UAE) తన దేశంలోని ఉద్యోగులందరికీ ఈ పథకాన్ని వర్తింపజేస్తోంది. చేరడం తప్పనిసరి కూడా చేసింది. అక్టోబరు 1లోపు సైన్ అప్ చేయని వారికి జరిమానా విధిస్తామని కూడా హెచ్చరించింది.
అసంకల్పిత ఉపాధి బీమా (ILOE)గా పిలువబడే ఈ పథకం జనవరి 1, 2023 నుండి అమలులోకి వస్తుంది. ఇప్పటివరకు 55 లక్షల 34 వేల మంది ఉద్యోగులు ఈ పథకంలో చేరారు. గడువు తేదీలోగా సంతకం చేయకపోతే, 400 దిర్హామ్‌లు (9 వేల కంటే ఎక్కువ) జరిమానా విధించబడుతుంది.
నిరుద్యోగ బీమా లబ్ధిదారులు తమ ఉద్యోగాలను కోల్పోతే వారి సగటు ప్రాథమిక జీతంలో 60 శాతం వరకు పొందవచ్చు. ప్రతి క్లెయిమ్‌కు గరిష్టంగా 3 నెలల వరకు నగదు ప్రయోజనాలు అందించబడతాయి. కానీ క్లెయిమ్ ఫైల్ చేయడానికి ఉద్యోగికి కనీసం 12 నెలలు చెల్లించి ఉండాలి. నిరుద్యోగానికి కారణాన్ని రుజువు 30 రోజుల్లోగా సమర్పించాలి.
భారతదేశంలో ప్రత్యేక నిరుద్యోగ బీమా లేదు. అయితే ఎంప్లాయ్‌మెంట్ స్టేట్ ఇన్సూరెన్స్ కార్పొరేషన్ నుంచి ఈ ప్రయోజనాలను పొందవచ్చని నిపుణులు చెబుతున్నారు. రాజీవ్ గాంధీ శ్రామిక్ కళ్యాణ్ యోజన (RGSKY) మరియు అటల్ బీమిత్ వికీ కళ్యాణ్ యోజన (ABVKY) పథకాల ద్వారా నిరుద్యోగ ఉద్యోగులు ఆర్థిక సహాయం పొందవచ్చని చెప్పారు. పూర్తి వివరాల కోసం ESIC వెబ్‌సైట్‌ను సందర్శించాలని సూచించారు.
