అమరావతి: పేదలందరికీ నవరత్నాల పథకంలో భాగంగా ఉచిత ఇళ్ల స్థలాల నమోదు కోసం గ్రామ వార్డు సచివాలయాలను జాయింట్ సబ్ రిజిస్ట్రార్ కార్యాలయాలుగా గుర్తిస్తూ ప్రభుత్వం నోటిఫికేషన్ విడుదల చేసింది. రిజిస్ట్రేషన్ల చట్టంలోని సెక్షన్ 7 ప్రకారం, గ్రామ వార్డు సచివాలయాలు ఇక నుంచి ఫ్రీహోల్డ్ ఇళ్ల రిజిస్ట్రేషన్ కోసం జాయింట్ సబ్-రిజిస్ట్రార్ కార్యాలయాలుగా మారనున్నాయి.
జగనన్న శాశ్వత భూమి హక్కుల పథకం కింద సెంటు భూమిని రిజిస్ట్రేషన్ చేసేందుకు ప్రభుత్వం గ్రామ వార్డు సచివాలయాలను జాయింట్ సబ్ రిజిస్ట్రార్ కార్యాలయాలుగా మార్చింది. తమ పరిధిలోని లబ్ధిదారులు తమ పట్టాలను సమీపంలోని గ్రామ వార్డు సచివాలయాల్లో నమోదు చేసుకోవాలని నోటిఫికేషన్ జారీ చేసింది. సచివాలయాల్లో పంచాయతీ కార్యదర్శులు, వార్డు అడ్మినిస్ట్రేటివ్‌ కార్యదర్శులకు జాయింట్ సబ్ రిజిస్ట్రార్ హోదా కల్పిస్తూ ప్రభుత్వం రెండు వేర్వేరు నోటిఫికేషన్లు జారీ చేసింది. స్టాంపుల రిజిస్ట్రేషన్ శాఖ కమిషనర్, ఐజీ సూచనల మేరకు ఈ నోటిఫికేషన్ ఇచ్చినట్లు సమాచారం. ఈ నోటిఫికేషన్ వెంటనే అమల్లోకి వస్తుందని ప్రభుత్వం స్పష్టం చేసింది.
